عارفة يعني إيه إحنا صحاب ؟
يعني تطلعي فرمان إنه لو عايزة انكد
انكد معاكي انتِ بس
علشان صورتي تفضل حلوة قدام الناس
عارفة يعني إيه إحنا أصحاب ؟
يعني تحطي لىّ كلمة توجع في وسط كلامك معايا
علشان تفوقيني عن حاجة غلط انا بعملها
عارفة يعني إيه إحنا أصحاب ؟
يعني لما اقولك انا نجحت و جبت جيد جدًا
تردي علىّ : بس في عيني أنا إمتياز
عارفة يعني إحنا أصحاب ؟
يعني لما الاحداث تخلي مخي يشل عن التفكير
اجيبك تفكري لىّ بصوت عالي
عارفة يعني إيه إحنا صحاب ؟
يعني تقولي لىّ إنك نفسك تخلفي بنوتة
علشان تسميها على اسمي
عارفة يعني إيه إحنا أصحاب ؟
يعني مهما تلف الدنيا بينا و نبعد عن بعض
أول ما يبقى في مشكلة ،
أنا أول حد يترفع عليه سماعة التليفون
عارفة يعني إيه إحنا صحاب ؟
يعني تشكري فىّ قدام حد من اهلى
و انا اعرف بعد كدا صدفة
عارفة يعني إيه إحنا أصحاب ؟
يعني لما اغلط و آجي اتأسف لك
تقولي لىّ : اسفك مرفوض ،
لاني بحبك لدرجة تخليكي ماينفعش تتأسفي
عارفة يعني إيه إحنا أصحاب ؟
يعني لما اتعصب عليكي
تلتمسي لي ميت عذر
و تعتذري لنفسك نيابة عني
عارفة يعني إيه إحنا صحاب ؟
يعني تبطلي تعملي الموبايل سايلنت و انتي نايمة
علشان انا ممكن اكلمك أخد رأيك في حاجة هبلة
عارفة يعني إيه إحنا أصحاب ؟
يعني مهما حاولت أخبي عليكي مصيبة انا عملاها
اول ما يجي وشي في وشك ..
أقر بكل حاجة
عارفة يعني إيه إحنا أصحاب ؟
يعني تبقي في عيني :
احلى حاجة ممكن تحصل في حياة أي بني آدم
عارفة يعني إيه إحنا أصحاب ؟
يعني استمتع بإني انكش فيكي على الفون
لحد ما تهدديني انك هتقفلي السكة في وشي
عارفة يعني إيه إحنا أصحاب ؟
يعني بحبك لدرجة :
إنه و إحنا متخانقين أفضل احلم بيكِ
اهداء الى جميع اصدقائي واصحابي الحلوووويييين